Einstaklingar

Fyrirtæki

Um Póstinn

Leita
Finna sendingu
Skrá sendingu
Innskráning
Pósthús og opnunartímar
EN IS
Hafa samband
Loka

Bréfum dreift annan hvern dag

Bréfum dreift annan hvern dag

31.janúar 2018
  • Dreifingardögum bréfapósts fækkað í takt við eftirspurn
  • Sama tíðni verður nú á bréfadreifingu um allt land
  • Pökkum verður áfram dreift alla virka daga og verður þjónusta tengd þeim efld á ýmsa vegu


Eins og Pósturinn tilkynnti í nóvember 2017 mun bréfadreifing í þéttbýli breytast frá og með 1. febrúar. Með breytingunum verður dreifingardögum bréfapósts í þéttbýli fækkað og borið verður út annan hvern virkan dag. Sú staðreynd að eftirspurn eftir bréfadreifingu er sífellt að minnka kallar á þessar breytingar og að dreifingardögum fækki hér á landi líkt og gerst hefur víðsvegar um heim og þar á meðal í nágrannalöndum. Eftir að breytingarnar taka gildi verður sama tíðni á bréfadreifingu um allt land en árið 2016 var ráðist í samskonar aðgerðir í dreifbýli. Með breytingunum færist bréfadreifing nær eftirspurn eftir þjónustunni en bréfum hefur fækkað um meira en 56% frá árinu 2007 og um 9% á síðasta ári á sama tíma og kostnaður við bréfadreifingu hefur aukist, m.a. vegna fjölgunar íbúða og fyrirtækja. Póstburðargjöld hafa að undanförnu ekki staðið undir þjónustunni af þessum sökum. Að fleiri bréfum sé dreift í hverri ferð er bæði umhverfisvænni kostur og hagkvæmari.

Fækkun dreifingardaga er heimil samkvæmt reglugerð sem var gefin út af innanríkisráðuneytinu árið 2017. Í henni kemur fram að heimilt sé að fækka dreifingardögum ef eftirspurn almennings og fyrirtækja á þjónustu innan einkaréttar hefur minnkað verulega og er ekki í samræmi við framboð þjónustunnar.

Eftir breytingarnar verður öllum bréfapósti dreift á næstu þremur virku dögum eftir póstlagningu eins og átt hefur við um B-póst á síðustu árum. Það þýðir að A-póstur sem hefur verið borinn út daglega verður ekki lengur í boði. Um 70% pósts er þegar í B-pósti. Pósturinn mun áfram bjóða upp á að dreifa bréfum næsta virka dag en í boði verður nýr valkostur, svokallað forgangsbréf.

Pakkadreifing mun áfram fara fram daglega en áframhaldandi vöxtur er á pakkasendingum, bæði til landsins og innanlands. Pósturinn mun halda áfram að efla þjónustu sína á sviði slíkrar dreifingar og svara þannig breyttum þörfum almennings.

---

Ingimundur Sigurpálsson, forstjóri Póstsins: „Þetta er nauðsynlegt skref í takt við breyttar þarfir fólks. Við horfum fram á áframhaldandi fækkun bréfa á næstu árum enda hafa samskiptaleiðir verið að breytast mikið og fólk velur oftar en ekki aðra kosti en bréfapóst til að koma skilaboðum áleiðis. Það er búið að vera fyrirséð lengi að bréfadreifing alla virka daga er ofþjónusta. Bréfum hefur fækkað um meira en helming á síðustu 10 árum en á sama tíma hefur bréfalúgum fjölgað og fólksfjöldi hefur aukist sem hefur leitt til þess að bréfberar eru að fara víðar með sífellt færri bréf. Tímarnir breytast og er mikilvægt að fyrirkomulag bréfadreifingar þróist í samræmi við það. Tækifæri Póstsins liggja fyrst og fremst í að auka áherslu á pakkaþjónustu og bæta hana á komandi árum.“

  • Netsamtal

Fótspor

Velkomin á vefsíðu Póstsins. Þessi síða notar fótspor (e. cookies) til að bæta upplifun þína á vefnum. Lesa nánar um notendaskilmála hér