Einstaklingar

Fyrirtæki

Um Póstinn

Leita
Finna sendingu
Skrá sendingu
Innskráning
Netsamtal
Pósthús og opnunartímar
EN IS
Hafa samband
Loka

Bréfadreifing verði í takt við eftirspurn

Bréfadreifing verði í takt við eftirspurn

7.nóvember 2017

Pósturinn hyggst fækka dreifingardögum bréfapósts í þéttbýli frá og með 1. febrúar næstkomandi en bréfum hefur fækkað mjög á undanförnum árum eða  um 52% frá árinu 2007 og heil 7% það sem af er þessu ári. Í reglugerð um póstþjónustu er kveðið á um heimild til þess að fækka dreifingardögum ef eftirspurn almennings og fyrirtækja á þjónustunni hafi minnkað verulega og er ekki í samræmi við framboð hennar. Minnkandi eftirspurn eftir bréfadreifingu kallar á að Pósturinn feti í fótspor póstfyrirtækja í nágrannalöndunum og fækki dreifingardögum. Búið er að tilkynna Póst- og fjarskiptastofnun um fyrirhugaða breytingu og er málið nú þar til meðferðar. Á síðasta ári var hætt að bera póst út daglega í dreifbýli og verður því tíðni bréfadreifingar hin sama um allt land þegar breytingin tekur gildi 1. febrúar næstkomandi.

Um 70% bréfapósts er nú þegar B-póstur sem dreift er innan þriggja daga
Legið hefur fyrir um nokkra hríð að eftirspurn eftir því að senda bréf sem borin eru út strax næsta dag sé ekki lengur næg til að standa undir óbreyttu þjónustustigi. Breytingin felur í sér að hér eftir verður svokallaður A-póstur, sem hefur verið borinn út daglega, ekki lengur í boði. Þess í stað verður öllum almennum bréfum dreift á næstu þremur virku dögum eftir póstlagningu líkt og gert er með B-póst. Nú þegar eru um 70% af bréfapósti B-póstur. Þeir sem það kjósa geta eftir sem áður sent bréf sem dreift er næsta virka dag en þau heyra þá undir vöruflokkinn „rekjanleg bréf“.

Pökkum verður áfram dreift alla virka daga en mikill vöxtur er í pakkasendingum hér á landi samhliða aukinni netverslun. Mun Pósturinn efla enn frekar þjónustu sína á því sviði í takt við óskir og eftirspurn viðskiptavina. Má þar nefna laugardagsdreifingu á pakkasendingum sem hófst á höfuðborgarsvæðinu nú í nóvember.

Brynjar Smári Rúnarsson, forstöðumaður markaðsdeildar Íslandspósts: „Bréfum hefur fækkað um meira en helming á liðnum áratug þrátt fyrir fólksfjölgun á sama tíma, en því fylgir aukinn kostnaður á hvert sent bréf. Þessi þróun hefur lengi verið fyrirséð, enda bjóðast nú margir hraðvirkari og einfaldari samskiptamátar en bréfasendingar.  Það er skiljanlegt að einhverjir muni sakna þess að fá ekki lengur daglega heimsókn frá bréfberanum, en þjónusta Póstsins þarf, rétt eins og þjónusta annarra fyrirtækja, að breytast í takt við nýja tíma. Pósturinn var bréfafyrirtæki sem bauð einnig pakkasendingar en er í dag pakkafyrirtæki sem býður líka upp á bréfasendingar. Þetta er ekki í fyrsta sinn sem við gerum breytingar sem þessar enda hefur fyrirtækið þurft að bregðast við nýrri samskiptatækni og hefur breytt starfseminni jafnt og þétt í samræmi við breyttar þarfir og óskir viðskiptavina. Þörfin fyrir bréfadreifingu hefur minnkað mikið með nýjum boðleiðum og sú þróun mun halda áfram. Um leið vill fólk fá pakkasendingar til sín svo hratt sem mögulegt er og leggjum við áherslu á að bregðast fljótt og vel við þeim óskum um þjónustu Póstsins.”

 

  • Netsamtal